சுமை தாங்கும் மொட்டுக்கள் !

படித்துக் களிக்கின்ற வயதில் - மகனைப்
   பள்ளி அனுப்பாம லேயே ...
கடிந்தே என்னென்ன வேலை - இங்கே
   செய்ய்ச் சொல்கின்றார் பெற்றோர் !

காலை மாலையென இன்றி - தன்
   காலில் ஏதுமணியா சிறுவர்
சாலை ஓரங்களில் கிடந்து - பிறர்
   செருப்பைத் துடைக்கின்றார் பாரீர் !

சிறிய வயிறுதனைப் பேண - இந்த‌
  சிறுவர் படுந்துன்பம் பெரிது !
பெரிய உணவகங்கள் தன்னில் - எச்சில்
   தட்டுகள் அகற்றிடுவார் பாரீர் !

ஓடித் திரிகின்ற பருவம் ! - அதிலே
   ஓய்வே இல்லாமல் தினமும்...
பீடித், தீப்பெட்டித் தொழிலில் - பல‌
   பாடு படுகின்றார் பாரீர் !

எட்டு வயதாக வில்லை ! - உலகம்
   ஏதும் அறியாத பிள்ளை !
மொட்டு மலராத முல்லை - மேலே
   பெரிதாய் சுமத்தலாமோ கல்லை?

நெஞ்சு துடிக்கின்ற தய்யா ! - இவர்
   நிலைமை நினைக்கின்ற போதே !
பிஞ்சு உடம்பெல்லாம் இனியும் - இப்
   பாடு படும்நிலையை ஒழிப்போம் !

பெருமை சேர்த்திடும்நல் கல்வி ! - அதைப்
   பெரிதாய் அவர்கட்குத் தருவோம் !
அருமை செல்வங்கள் சிறுவர் - இதை
   அகத்தோடு நிறுத்தி செயல்படுவோம் !