போராட்டம்

போராட்டம் என்றாலே 'போர்' போல எனும்பொருளில்
   பெரியதொரு வன்முறையில் களம்காண்பார் சிலபேர்கள் !
பாராட்டும் வகையினிலே இடையூறு அவையின்றி
   பேரமைதிப் போராட்டம் செய்வார்கள் சிலபேர்கள் !

குடியரசு நாட்டினிலே கோரிக்கை வைப்பதற்கு...
   முறையான வழியதுதான் 'போராட்டம்' என்றிடினும்
அடிதடியும் சண்டைகளும் சுயநலத்தில் ஏவிடுவோர்
   நடத்திடுமோர் நாடகமாய் நாடோறும் காண்கின்றோம் !

அநியாயம் செய்வோரும் போராட்டம் எனும்பெயரில்
   அக்கிரமங்கள் செய்வதையும் அங்கிங்கு பார்க்கின்றோம் !
துணிவான மனதோடு ஒடுக்கங்கள் செய்யாமல்
   சட்டத்தைக் காப்பாரும் பாசாங்கு செய்கின்றார் !

பொதுநலமே முதன்மையென மகாத்மா போன்றோர்கள்
   போராட்டம் செய்தனரே ! பாராட்டி வாழ்த்திடலாம்!
எதுநலமே என்றேதும் உணராது பணத்திற்கே
   குழுசேர்ந்து குரல்கொடுத்தல் யாருக்கு லாபமிங்கே?

செய்திடுவோம் போராட்டம் அமைதிமிகு புரட்சியென!
    செய்வோர்கள் எல்லோர்க்கும் நலன்பயக்கும் காரணத்தில் !
உய்த்திடுமே உலகமெலாம் நல்வழியில் தான்தோய்ந்து !
   உயர்வுரலாம் எல்லோரும் ஒருசேரத் தானிங்கு !