பெருமழையில் பெருக்கெடுத்த மனிதாபிமானம் !

​

​ஊற்று மன்றம் நடத்திய பொங்கல் கவிதைப் போட்டி-2016-க்கு நான் எழுதிய படைப்பு...உங்கள் பார்வைக்கு....​வெற்றி பெற்றவர்களுக்கு வாழ்த்துக்களுடன்...!

----------------------

​வானம்பார்த்த பூமியில நாமவாழறோம் ! - அந்த

   வருணனவன் பார்வையையே நம்பியிருக்கிறோம் !

யாகம்செஞ்சு படையல்வெச்சும் வேண்டிக்கிட்டோமே !  - பஞ்ச

   கல்யாணிக்கு கல்யாணமும் செஞ்சுவெச்சோமே!

பரவலாக பொழியுமுன்னு நினைச்சிருந்தோமே ! - மழை

    சிலமணியில் தொடர்ந்துவர தவிச்சுபுட்டோமே !

இரவலாக வாங்கியதை கொடுத்தமனுஷனே...- வந்து

   இரக்கமின்றி பிடுங்கியதைப்போல் திகைச்சுபுட்டோமே !

வெள்ளமென கரையுடைத்து ஊரில்வந்ததே... !- மழை

   நீருமட்டும் வந்திடல... அதையும்தொடர்ந்துதான்...

உள்ளம், நல்ல உள்ளங்களும் வாசல்வந்ததே ! - ஒரு

   உதவிக்குநாம் இருக்கோமுன்னு சொல்லிவந்ததே !

சாதிஎன்ன? மதமுமென்ன? கேள்விகேட்கல - நம்ம

  சோகத்துக்கு தோள்கொடுத்த முகமும்மறக்கல !

'சோதி'யென ஒளிருமந்த உதவும்மனசுதான் ! - இங்கே

  இருண்டுபோன வாழ்க்கையில வெளிச்சம்காட்டுது !

நல்லஉள்ளம் இன்னும்பல இருப்பதைச்சொல்ல - பெரும்

  வெள்ளம்வந்து ஊருக்கெல்லாம் உணர்த்தவேணுமா?

சொல்லிடுவோம் நன்றியினை அப்புனிதருக்கெல்லாம் ! - இங்கே

  தெளிந்ததுவே மானுடத்தின் பெருமைநமக்கெல்லாம் !